Premio "Celanova, Casa dos Poetas"

Inicio Actividades Premio Celanova Casa dos Poetas

Medalla_Casa_dos_Poetas_A Co gallo de lembrar cada ano a Manuel Curros Enríquez e a Celso Emilio Ferreiro, dúas das máximas figuras literarias da Galicia do século XIX e XX e dous dos máximos expoñentes da poesía civil a partir do Rexurdimento, nados, ámbolos dous, na popular “Calle Arriba” de Celanova, a Fundación Curros Enríquez (antes o Patronato) en colaboración co Concello de Celanova, leva dende o ano 1985 organizando anualmente o premio “Celanova casa dos poetas” que pretende homenaxear un galego que ó longo da súa vida se teña significado pola defensa dos valores culturais de Galicia no máis amplo sentido da palabra.

O premio consiste nunha medalla de prata, obra do escultor Acisclo Manzano, que reproduce por unha cara a casa de Curros Enríquez, e pola outra cinco “C” concéntricas que simbolizan a letra pola que comezan os elementos identificativos deste premio “Casa dos poetas , Curros Enríquez, Celanova, Celso Emilio Ferreiro e Castor Elices”.

O galardoado recibe tamén unha placa de prata na que se recolle un resumo da acta do acordo, co fin de dar fe da concesión do premio.

No acto de entrega, o premiado asina sempre no libro de honra do premio, acostumando a deixar unha frase para o recordo.

O premio tenta recoñecer cada ano a unha persoa ou entidade que ó longo da súa vida se ten significado especialmente por desenvolver un intenso labor a prol da cultura galega en tódalas súas facetas, ou da propia Galicia.

Datas de concesión:

Faise público o día 7 de marzo, coincidindo coa data do falecemento de Manuel Curros Enríquez e entrégase no transcurso dun acto que se celebra o primeiro domingo de setembro inmediato ó día 31 de agosto, que é a data do pasamento de Celso Emilio Ferreiro, tentando unir así, as datas finais das dúas figuras más salientables das letras de Celanova.

Xurado:

O xurado está composto exclusivamente polo Padroado da Fundación Curros Enríquez, que preside o alcalde de Celanova, en calidade de presidente de feito da Fundación, e da que forman parte representantes de diversas institucións e entidades galegas, ademais de xentes de diversos ámbitos culturais e sociais de Celanova, tendo como figura máis salientable no seu seo a do escritor orixinario de Vilanova dos Infantes, Xosé Luís Méndez Ferrín.

Relación de Galardoados:

1985: Xosé Luis Méndez Ferrín (Escritor)

Uxío Novoneyra (Escritor)

Alfredo Cid Rumbao (Historiador)

Ricardo Carballo Calero (Escritor)

1986: Anxel Fole (Escritor)

1987: Xaquín Lourenzo-Xocas (Etnógrafo)

1988: Carlos Velo Cobelas (Cineasta)

1989: Xosé Neira Vilas (Escritor)

1990: Manuel Maria Fernández Teijeiro (Poeta)

1991: José Otero Abeledo “Laxeiro” (Pintor)

1992: Mesa para a defensa do galego en Asturias (Colectivo cultural)