VEN COÑECER A CELANOVA DE CELSO EMILIO

Un dos principias obxectivos da Fundación Curros Enríquez é achegar a todos os estudantes de Galicia as figuras dos grandes poetas nacidos na vila de Celanova, como son Manuel Curros Enríquez e Celso Emilio Ferreiro.

A nosa proposta compaxina o estudio da vida e obra dos poetas e a lectura dalgunhas das súas composicións ao aire libre coa visita turística, dunha  forma variada, amena, didáctica e que aspira a romper a cotianeidade da aula. Trátase pois dun magnífico complemento á clase de galego ao mesmo tempo que, percorrendo os lugares de Castromao, Vilanova e Celanova se pode facer "Un paseo pola historia de Galicia".

 PROGRAMA:  A CELANOVA DE CURROS E CELSO EMILIO

11:00

Recepción e visita á Casa dos Poetas (Idade Contemporánea. Rexurdimento da literatura galega): Tras a benvida a Celanova “Terra dos poetas”, dirixirémonos á casa familiar de Curros, onde coñeceremos a súa historia e afondaremos na vida e obra dos poetas. Na mesma rúa poderemos ver a casa familiar de Celso Emilio Ferreiro. Duración da visita guiada: 1 hora.

12:00

Descanso e xogo literario: Seguindo un mapa que imita unha liña de metro, os participantes deberán percorrer as rúas da vila e buscar as estrofas que completan un coñecido poema de Celso Emilio Ferreiro. Un cento de comercios colaboran neste xogo que simula a recollida de selos do Camiño de Santiago, acollendo durante 2012 diferentes versos do poeta nos seus escaparates. NOVIDADE

13:00

Visita ao Mosteiro de San Salvador (Alta Idade Media. Idade Moderna. O barroco. A desamortización): Trátase dun fermoso mosteiro do século XVIII que esconde nas súas traseiras a capela mozárabe de San Miguel, datada no S.X e única no seu estilo en Galicia. Este edificio foi usado tamén como prisión durante a represión franquista, sendo un dos presos máis coñecidos Celso Emilio Ferreiro. Duración da visita guiada: 1 hora, polo interior da igrexa (incluído o coro alto e a sancristía), o claustro barroco e a capela de San Miguel. Consultar tarifas na oficina de turismo Tfno. 988.432.201

14:00

Xantar

15:30

Actividade literaria pola vila de Celanova. Lectura de fragmentos de poemas ou prosa polos alumnos. A partir de marzo de 2012, ano de Celso Emilio Ferreiro, estará xa dispoñible o proxecto ‘Poemas na rúa’ que consiste nun percorrido por distintas rúas da vila a través de textos literarios colocados en 14 paneis que se pode facer guiado ou por libre. O itinerario contén textos de Manuel Curros Enríquez, Celso Emilio Ferreiro, Xosé Luís Méndez Ferrín, Castor Méndez Brandón e Castor Elices, todos eles poetas locais. NOVIDADE

16:30

Vilanova dos Infantes (Baixa Idade Media): Vilanova dos Infantes foi a aldea natal da nai de Curros e tamén está moi relacionada con X.L. Méndez Ferrín. É un pequeno burgo medieval no que destaca a Torre da Homenaxe, a cova de San Vivián, que acolle unha exposición permanente sobre os zapateiros, e un dos poucos Cristos románicos que se conservan na provincia.

Visita á Virxe do Cristal (Tradición mariana): Trátase dunha pequena imaxe da virxe envolta polo misterio de como a súa figura foi introducida no medio dun cristal de vidro e que foi popularizada pola lenda de Curros.

18:00

Volta ao lugar de destino ou realización dalgunha actividade alternativa:

Visita a Castromao. A tan só 2 km de Celanova está un dos xacementos arqueolóxicos máis interesantes de Galicia datado entre os séculos VI ou V a.c. É un castro ocupado xa dende unha época prerromana e que logo sufriu unha forte romanización. Trátase polo tanto dun xermolo do que agora é Celanova. Duración aproximada de 1 hora. Visita guiada segundo dispoñibilidade de persoal e previa solicitude.

Visita ao Museo dos Zapateiros en Vilanova dos Infantes. Visita previa solicitude. NOVIDADE

 VANTAXES DO PROGRAMA:

- FACILIDADE na organización: Cada programa adaptarase ás necesidades de cada grupo concertando as visitas escollidas.

- BAIXO CUSTE das visitas: A maioría das visitas son gratuítas.

- Todas son visitas GUIADAS.

- INTERACCIÓN con outros departamentos docentes: As visitas poden ser compaxinadas con outros programas formativos como son os Concertos Didácticos de órgano, así como cunha visita guiada a Celanova a través da música.

- PERNOCTACIÓNS: Existe a posibilidade de usar o albergue da vila o que permite organizar a estancia en dous ou máis días. Consultar tarifas no Concello de Celanova.

Os horarios son orientativos.

A actividade literaria guiada está supeditada á dispoñibilidade do persoal da Fundación Curros Enríquez.